جمعة بيشــــــــم النسيم

جمعة بيشــــــــم النسيم

أخيرا يا عالم جه يوم اجازة .. الواحد كان نفسه يستريح من تعب الجامعة وشقى المواصلات وتناكة الطلبة وختم حرس الجامعة .. يااااااه شم النسيم ده جه فى وقته بالظبط

المهم اتفقت انا والشلة ان احنا نقضى اليوم فى اى مصيف ان شاء الله حتى كفر ابو طشط
اهم حاجة يكون فى ميه وهوا ورمل وخلاص

صحيت مفزوع يوم الاتنين الصبح على ريحة وحشة اوووى ..

انا قلت ابويا بيصحينى بالشراب بتاعى كالعادة .. لكن الريحة المرة دى افظع بكتير اوووى .. فتحت عينى بالعافية
لقيت اختى الصغيرة ماسكة فسيخة فى ايدها وقاعدة تلعب بيها ..
بعد محاولات يائسة عشان اخرجها بره فشلت كلها ..

قمت قايم وحادفها من البلكونة
اكيد يعنى الفسيخة مش اختى ..


لقيت ابويا جاى جرى .. وقام رافعنى من رقبتى وهوب حتة سوبلكس وتثبيت اكتاف
وقالى بصوت عااااااالى ... انت عارف الفسيخة دى بكام يا مفترى ده الكيلو منها بـ 90 جنيه .. بعد تدخلات من امى انتشلتنى من تحته .. وجريت على اوضتى عشان اغير هدومى واسافر .. غيرت واتشيكت ودلقت على هدومى ازازة البرفان بتاعتى
عشان اخلص من الريحة دى

نزلت جرى على السلم واتصلت بالعيال .. عرفت انهم سبقونى على دمياط الجديدة
ركبت تاكسى محترم ورحت على الاتوبيس الدولى .. ركبت اتوبيس دمياط واول ما الاتوبيس بدأ يتحرك لقيت اتوبيس تانى سوبر جيت جاى وقام هوب كاسر عليه وواقف قدامه ونزل السواق وجه جرى يتشاكل مع السواق بتاع اتوبيسنا .. وازاى تحمل قبلى
ده الدور بتاعى .. طب والله ما انا شايل الاتوبيس من قدامك .. ياعم يهديك يرضيك
مفيش فايدة .. ياعم فى ناس مستعجلة .. نزلت اتفاوض مع السواق التانى
قالى لا يمكن يا جدع .. انت عايزنى اطلق مراتى ولا ايه .. انا حالف بالطلاق

يمين شمال .. مسكوا فى بعض وهات يا ضرب واتحول الاتوبيس الدولى لغزوة بين السواقين .. ولا كأن فى بنى ادمين راكبين .. لقينا مدير الاتوبيس جاى وعينه وارمة
ووشه بيخر دم من كل حتة .. وقالنا بكل ثقة
" لا مؤاخذة يا بهوات مفيش رحلات النهاردة ... عشان عندنا شوية اصلاحات فى الباصات "
وقام مغمن عليه علطول ..

قعدت افكر اعمل ايه اعمل ايه .. قلت اروح الموقف الجديد .. ركبت طلخا ورحت لقيت مينى باص كبير .. والتباع بينادى .. دمياط الجديدة .. دمياط الجديدة

رحت جرى ركبت و هه لسه بنقول يا هادى .. لقيت الركاب هوب كلهم بيجروا وبينزلوا من المينى باص .. ولقيت الراجل اللى جمبى بيقولى شيلنى يا بنى اوام .. شلت الراجل وطلعت جرى ورا الناس .. بصيت لواحد جمبى .. بقوله فى ايه يا كابتن .. قالى اجرى بسرعة بس .. فضلت اجرى وانا شايل الحاج العجوز على كتفى .. الجزمة بتاعتى اتقلعت .. فحاولت اقف عشان اجيبها .. لقيت العجوز بيقولى هو ده وقته اجرى اجرى .. كملت جرى وانا بفردة واحدة .. انا قلت فى نفسى انفد بجلدى ان شاء الله حافى حتى .. قلت لهم هو المينى باص هيفرقع ولا ايه .. قالى اجرى يااستاذ .. واركب الميكروباص ده بسرعة .. لقيت كل اللى حواليا بيقولوا لى اجرى اجرى ولا أكنى فى التراك وبلعب فى المونديال

وصلت الميكروباص من هنا .. وخلاص نفسى جاب اخره و بيقول البطارية ضعيفة

ركبت وقعدت الحاج العجوز جمبى .. وسالت اللى قدامى هو احنا كنا بنجرى ليه ؟
قالى عادى يعنى .. اصل الميكروباص ده ارخص ربع جنيه من المينى باص

بصيت للحاج .. وجزيت على سنانى وانا نفسى البسه مكان الفردة التانية ..

قلت فى نفسى معلش يا جمعة كله يهون عشان نشم النسيم

لقيت السواق جاى بيتطوح يمين وشمال وقام راكب .. وشكله اكيد شارب حاجة
دور العربية وطلع .. ومفيش ربع ساعة ببص قدامى لقيت تيرلة جاى فى وش الميكروباص وتقريبا سواقنا كان نايم او خارج نطاق الخدمة او بيهزر مع التيرلة

والركاب ما صدقوا بقى .. هاتك يا صوييييييت .. يخرااااااابى .. الحقوووونا واللى كان بيتشاهد .. واللى بيعيط .. وكل ده كوم .. والعجوز اللى جمبى كوم .. ماسك فى ايدى وقاعد يضغط عليها .. لما فرمها لى .. وقاعد يعيط .. سيب ايدى يا حاج خلى كل واحد يموت لوحده .. لا يمكن .. طب عشان يعرفوا يطلعوا الجثث .. وده ولا فى دماغه .. يضغط اكتر اكتر
يا حاج انت هتقرفنى وانا عايش وانا ميت .. اتقى الله بقى يا جدع وسيبنى

فين وفين .. واحد ابن حلال صحى السواق .. اللى قام محود بسرعة وداخل ديييييب فى الرصيف

كل الناس قاعدين يحمدوا ربنا .. والعجوز المنيل على عينه مغمض عينيه ولسه بيعيط وماسك فى دراعى .. قلت له خلاص يا حاج .. حصل خير .. سيب ايدى بقى
لا يمكن .. ومتبت جاااااااامد .. عشان خاطرى يا عم .. فين وفين .. فك ايده .. بعد ما حفر مكان فى ايدى ..

نزلنا من الميكروباص .. لانه اكيد ادغدغ .. واحنا فى حتة فاضية وشبه مقطوعة .. المهم قعدنا نشاور لاى حد عشان يقف لنا .. مفيش فايدة .. لغاية ما فجاة لقينا 3 تكاتك ( جمع توك توك .. وهو اختراع يمشى على 3 عجلات ) جم وقفوا .. ونزل منهم 6 ملثمين .. و معاهم اسلحة بيضا
وحوطونا كولنا .. وقالك كل واحد يطلع اللى معاه .. فلوس و ساعات ودهب و موبايلات
حاولت استفسر من الكبير بتاعهم عن هم مين ولا تبع مين .. لقيت حاجة كبيرة كده زى ما تكون ايد بنى ادم .. وقام رافعها فوق فوق فوق .. وترررررن على وشى .. وقالى بصوت قريب اوى من صوت البنى ادمين
(( تسمع عن كراصنة السومال .. اهو احنا بقى كراصنة طريق دمياط ))

المهم بعد ما نفضونا وخدوا كل حاجة معانا وخلعوا فى التكاتك بتاعتهم .. ملقيتش مفر من الرجوع للمنصورة بقى .. اشعبط فى عربية ربع نقل ووصلت لغاية الموقف الجديد ..

خرجت من الموقف الجديد عشان اروح البيت .. لقيت 4 سواقين تاكسى فى نفس واحد .. تاكسى يا استاذ .. انا طبعا معييش فلوس .. لقيت اتنين منهم مسكوا فى بعض وهات يا ضرب فى بعض .. والاتنين التانين حالفين بالله .. ماهم هيسيبونى الا ما اركب وكل واد ماسك فى دراعى من ناحية وشد يا معلم
ولا اجدعها شد الحبل .. استجمعت كل ما تبقى من صحتى وقلت لهم والله ما معايا فلوس

سبحان الله تشوف الاربعة اللى كانوا بيتشاكلوا عليا لمدة اكتر من ربع ساعة .. كل واحد بيضرب حتة فيا .. اللى ربنا قدره على شلوت .. واللى ربنا رزقه بلكمية واللى مقدرش يطول حاجة فضل يشتم ..

سابونى مكوم على الارض .. وكل حتة فى جسمى بتقول اه يااااااانى


لغاية ما جه راجل بن حلال .. وقومنى ووصلنى لحد البيت
و من يومها وانا قاعد ابوس فى الفسيخ بتاع ابويا
ونايم مدغدغ .. لا وايه ... مستمتع بالريحة الجمييييييلة دى
وبقول فى سرى
ادى اخرت اللى يفكر يشمك يا نسيم

انا بكرهك يا نسيم بكرهك يا نسيم


اخوكم

جمعة ابو فسيخة

---

[lum fdaJJJJJJJJl hgksdl