يا راكبٍ من عندنا فوق ليموزين *** قله ترفق تـرى القلـب يرقـل
قله ترفق بالعيـال المساكيـن *** و بالقوارير اللي بتالي الليل ينقل
من شعر أبو الطيب 2009
ياراكبن من عندنا فوق ليموزين ...
معروف في المنتديات إن كل واحد له يوزر و له رتبه و هالرتبة أحيان زينة و أحيان تلقى الشخص وده يحط استكر تحت اسمه علشان ما تنشاف رتبته مثل البنات إذا حطن استكر على كاميرا اللاب توب لا تشتغل و هن غافلات لكن أنا وضعي غير عندي اسم و رتبة بعد بس في الحقيقة يعني في حارتنا اسمي حمود و رتبتي ( السبهه ) لذلك أنا مشهور بحمود السبهه و كانت رتبتي لفترة " الدبشة" بس أشوى ماطولت
تخرجت من الثانوي قبل عشر سنوات تقريباً ، صحيح أني أعتبر نفسي دافور و تخرجت بنسبة 77 % و من زيني كنت متوقع إن الجامعات تنتظر ملفي الأنيق عشان أسجل عندهم ، بعد الراحة و التبطح لثلاثة أشهر رحت و شريت ملف علاقي أخضر ، ملف واحد بس وشو له الخساير المهم جمعت وريقاتي في الملف و رحت للجامعة أقدم و أنا كاشخ بملفي
كنت أسمعهم يسموني (السبهه) في الحارة بس ما كنت اخذها على محمل الجد ، بس ضحكة الموظف في الجامعة يوم شاف نسبتي خلتني اواجه الواقع المرير طلعت فعلاً سبهه ... صدق اني طلعت سبهه رسمي أجل كاشخ بملفي ورايح أقدم للجامعة بنسبة 77 %
رجعت للبيت ضايق صدري و متحطم ضاع حلم الجامعة و الشهادة " الكبيرة" رحت لفراشي و نمت و أزعجت كل اللي في البيت لأني معروف إذا نمت أشاخر و إذا نمت و أنا زعلان يصير شخيري مثل محرك طائرة نفاثة مشقوقة كنداستها
مرت الأيام و أنا أكل و مرعى و قلة صنعه لين تمللو مني أهلي و ما يدرون وشي يسوون بي و في يوم من الايام كنت نايم و شخيري يملأ البيت و احلم حلم رومنسي و الوالدة تصوت لي تبيني أقوم حاولت أكمل النوم لعل و عسى يكتمل الحلم الرومنسي اللي كان من بطولة هيفاء وهبي لكن ما مر الا ثواني إلا و أنا احس بشوته قوية على ظهري و صوت الوالدة يزمجر ( قم ياثور) الوالدة الله يحفظها تحب تدلعني بالثور خاصة اذا جت تقومني من النوم ، فتحت عيني و ناظرت الوالدة بعين وحدة و قلت : خير ان شاء الله ليش تقوميني ؟ جهز الغداء مبكر اليوم؟ ردت الوالدة بصوتها المعروف و اللي عادة يهز أرجاء البيت و يتسبب بتساقط قطع من الجدران المتهالكة : قم يالله ، شف أبوك وش جاب لك طبعاً مجرد ما سمعت إن ابوي جاب لي شي نقزت من سريري كني بزر جايبين له اهله هدية ، لاني ما اتذكر ابوي جاب لي شي من عقب لعبة التلفزيون اللي فيها صور الحرم و هو راجع من الحج يوم كنت بثالث ابتدائي .
أسرعت للصالة و أنا متلهف أشوف وش جاب لي أبوي و أتخيل إنه جايبٍ لي تلفزيون جديد للملحق أو كمبيوتر اضيع وقتي عليه أو على الاقل كمبيوتر العايلة
يوم وصلت الصالة لقيت الوالد واقف عند كرتون كبير في وسط الصالة قلت له ماشاء الله جايب لي هديه ؟ وش في هالكرتون ؟
قال هذا كرتون ملفات علاقي خضر شريته من شارع السويلم من الجملة أبيك كل يوم تاخذ كم ملف و تدور على هالشركات تقدم على وظيفه كود يضفونك ، جلستك في البيت كنك حرمة في النفاس ما تصلح
كلمة الوالد (حرمة في النفاس) حزت في نفسي صحيح إنه كل يوم يقول لي ياحمار ياغبي يا سبهه بس حرمة في النفاس قوية بحقي و أن فرحانٍ بشنبي و سكسوكتي و آخرتها نفاس
صرت كل يوم اقوم الصبح و تفطرني الوالدة بيض و اخذ معي عشر ملفات و اخذ ليموزين و الف على هالشركات أقدم على وظيفة و كان الجواب الثابت : إن شاء الله نتصل عليك .... أو بمعنى آخر " موت ياحمار لين يجيك الربيع "
و في يوم من الأيام قابلت واحد جزاه الله خير ، قال لي وشو له تضيع ملفات و اوراق و خساير ... تدري ملفك هذا و أوراقك وين تروح؟ قلت له : ايه عند شئون الموظفين ، قال لي : لا يالسبهه هذي يجمعونها و يودونها لمصنع أطباق البيض .. يبيعونها عليهم و المصنع يفرمها و يصلح منها أطباق بيض و أنا اللي كنت أقول وشلون لقيت اسمي في طبق البيض اللي خذته من البقالة
من يومها كل مارحت لشركة أسئل الاستقبال : أنتم تبيعيون شيء لمصنع أطباق البيض ؟ إذا قال لي ايه رحت و خليته بدون ما اسلم ملفي شفتو اني مظلوم يوم يسموني السبهه و أنا ذهين
من كثر ما أركب ليموزينات تعرفت على سواق ليموزين أجودي أسمه (خان) صار يمرني كل يوم بدال ما انطق في الشارع لين يجي ليموزين ، توطدت علاقتي مع خان و صرنا خويا لدرجة إني صرت ما أفطر في البيت صرت آخذ سندوتشين بيض واحد لي وواحد لخان نفطر سوى في الطريق
بيني وبينكم أن اللي حببني في خان إنه دايم يريشني دايم يقول لي : أنتا مية مية نفر ، سعودي نفر كلو نوم أنتا يدور شغل أنتا مخ كويس يدور شغل في شركة ما يبغى شغل ليموزين هذا شغل ليموزين مافي كويس
و في أحد الأيام رن تلفون البيت و أنا توني متغذي و أبحط راسي و أنام ، رديت على التلفون صار شركة يبون يوظفوني طبعاً تشققت من الفرح .. أخيراّ صار فعلاً الصبر مفتاح الفرج
توظفت في وظيفة ( استقبال ) في أحد الشركات و بدت الفلوس تجري في يدي <<< اللي يسمعه يقول انه وارث و هو موظف استقبال بالفين ريال
بعد ما صار عندي وظيفة بديت أفكر في الزواج بديت أفكر في حضن دافي أفكر في سرير نظيف في فطور غير البيض و أهم شي بديت أفكر أتروش كل يوم
و اللي زاد تفكيري أكثر الكرت حق القنوات المشفرة اللي اشتريته من خان من جد خان هذا رهيب الظاهر لو أقول له أبي تروح للشغل تقولهم "حمود اليوم تعبان مافيه يجي شغل اليوم" إن يسويها و يصدقونه
حكيت معاناتي في موضوع العرس لصديقي الغالي سواق الليموزين خان ، قال لي بكل ثقة ما في مشكله رديت عليه : كيف مافيه مشكلة ياخان المهر بكم و البيت و المصاريف حتى جوالي خربت أزراره مهوب من التكليم من استعماله آلة حاسبة و أنا احسب مصروف العرس تصدق ياخان بديت أفكر أسافر للبحرين
قال لي أنتا اي شيء يبغى كولو في يبغى زواز موجود يبغى شي تاني موجود انتا ايش مزاج انا في خدمه ما يحتاج سفر بحرين مع خان كولو في
سئلته يعني اقدر اجرب حياة الزواج بكم يعني قال انتا مزاج ايش يبغى كلو مختلف سعرات (يعني الاسعار تختلف صار غنم مهوب زواج )
و طلّع خان جواله و وراني صور بنات و أنا مثل بزر ما عمره ذاق من الحلويات إلا حلاو مصاص و جابو له ايسكريم من باسكن روبنز يعني فعلاً سعبلت
الشيطان شاطر خلاني افكر اجرب من هالبنات ، خاصة إني كنت توني مستلم الراتب قلت ياولد العرس مهوب حاصل خل نجرب بضاعة خان
و فعلاً جربت الشغلة و أعجبتني صرت أصرف نصف راتبي على بنات عن طريق خان
و في يوم الايام و خان يوصلني لموعدي الغرامي قال انتا ما يبقا شراب قلت لا اعوذ بالله خمر تبيني أشرب خمر حرام ياخي قال لي هزا بنات حلال و الا حرام يعني هماك تنام مع بنات و هو حرام احرجني الصراحة حجته قوية و قال لي هزا انتا سوى سوى بنت شراب ... مية مية مبسوط
و صرت أصرف فلوسي كلها على البنات و الشراب عن طريق خان صرت زبون مميز عند خان لدرجة إنه صار يبوح لي بكل أسرارة ، قال لي إنه أصلاً يشتغل على الليموزين علشان يقدر يتعرف على شباب و بنات و يسوي مواعيد و ليالي حمراء و طبعاً شراب و مخدرات بس لأني صديقه ما ورطني في المخدرات بس بنات و شراب فيه الخير و الله
و في ليلة من الليالي ، كنت لابس و كاشخ و مستعد للسهرة شافتني أمي و قالت اللي يشوفك يالسبهه يقول عنك عريس قلت لها لا تخافين على ولدتس تراه ذيب المهم جاء خان و رحنا للسهرة الجماعية في شقة مليانة بنات و شباب و شراب يعني تقدرون تقولون فله شباب صيع و صلنا و دخلنا و ما امداني أجلس و أحضن لي بنت من هالبنات الزيون إلا و تصير مداهمة من الشرطة و الهيئة و مكافحة المخدرات و الإمارة و المجاهدين بعد ما بقي إلا حرس الحدود ما شاركو في المداهمة
ما يحتاج أقول لكم إنه حكم علي بالسجن و الجلد و خسرت وظيفتي اللي ضيعت سنوات ابحث عنها و ضيعت كرتون ملفات علاقي عشان أحصلها ... و أهم من هذا كله خسرت احترامي لنفسي و احترام الناس لي
التوقيع : حمود السبهه - الحاير
برايفت للوالدة : تراي ما طلعت ذيب طلعت حمار
-----------------------------------------------
مع إن الموضوع واضح و لا يبي له ( مايستفاد ) إلا إني أبحطه مخصوص للناس اللي يقرون أول سطر ثم يطمرون لنهاية الموضوع يشوفون الفايدة
ما يستفاد : مهوب كل ليموزين .. زين
و فالكم طيب
منقول
لاتنسون الردود
dhvh;fk lk uk]kh t,r gdl,.dk >>>
|[ آعلآنآت المنتدىآ ]| 
المواضيع المتشابهه
العرض العادي
